Amang, Inang, turpuk jamita di partangianganta di bodari on, i ma na nienet sian Lukas 9:22-27. Hujahahon ma di hita isina: “
Huria na hinaholongan ni Tuhanta Jesus! Ragam do pangantusion ni angka na torop na niajaran ni Jesus taringot tu hadirion ni Ibana. Haru di angka siseanNa pe, adong do imbar ni pangantusion ni sisean na sada tu nasadanari. Taringot tu hadirionNa i do na dipatorang Jesus songon na tarsurat di turpukta on. Di na laho manggombarhon taringot tu diriNa, dipangke Jesus do istilah Anak ni Jolma laho mandok diriNa.
Angka sitaonon do adopan ni Jesus songon na pinatorangNa di turpuk on. Laos i do na naeng tiruhonon ni angka na naeng siihuthon Ibana. Sian pandohan “manuhuk silang” na dapot di ayat 23, tarboto do, ingkon secara menyeluruh do paniruhonon ni angka na naeng mangihuthon Jesus.
Amang, Inang! Molo tajah turpukta i, di ayat 22, dipatorang Jesus do aha na naeng masa tu diriNa; na ingkon adopanNa do godang sitaonon, gariada bolonghonon ni angka panungganei ma Ibana jala pusaonNa, alai mulak mangolu do Ibana muse di ari patoluhon. Tontu maol do antusan ni angka sisean ni Jesus na nidok jala na sinuriranghonNa i molo pinahombar tu pemahaman ni bangso Jahudi taringot tu haroro ni Mesias.
Konsep Mesias na hinirim ni nasida i ma Mesias Politis, na manguluhon bangso i mulak gabe bangso na bolon, na berjaya jala na merdeka sian gomgoman ni harajaon Romawi. Hape haroro ni Jesus i ma dohot konsep “Hamba Tuhan yang Menderita”. On do na haru maol jaloon jala antusan ni halak Israel. Hombar tu pemahaman na so haru singkop on do umbahen na gogo diorai Jesus angka siseanNa i paboaboahon identitasNa songon Mesias naung pinabagabaga i.
Huria ni Tuhanta! Dung dipatorang Jesus tu angka siseanNa i, sitaonon na ingkon adopanNa, diuji Jesus do paingothon parsitutuon ni nasida laho mangihuthon Ibana. Dipaingot Jesus nasida taringot tu“sikap sejati” na ingkon adong di angka siihuthon Ibana, ima:
1. Na parjolo, rade manoadahon dirina, lapatanna: rade mangolu ndang be mangihuthon lomo ni rohana sambing, alai marsiajar patundukhon dirina tu lomo ni roha ni Debata. Rade marsiajar mangolu songon na nidok Kristus i “unang ma rohangKu saut, rohaM ma” (Luk. 22: 42).
2. Na paduahon, manuhuk silangna ganup ari, lapatanna rade mangadopi keadaan gabe jolma na ditulak portibion ala siihuthon Kristus, jala rade marsitaonon ala ni haporseaonna tu Kristus. Rade gabe jolma na so dihalomohon portibi on ala ndang be sarombang dohot portibion.
3. Na patoluhon, rade mangihuthon Tuhan Jesus, lapatanna gabe siihuthon Jesus, ndada gabe halak Kristen status sambing (halak na maragama Kristen sambing) alai naeng do gabe siihuthon Jesus na tutu, rade mardalan di dalan na nidalanan ni Jesus i sandiri. Rade agoan hosa ala ni haporseaonNa tu Jesus, songon haradeon ni Jesus mandalani Via Dolorosa, tanda haundukhonNa tu AmaNa.
Amang, Inang! Di udut ni turpuk i, lam dipatorang Jesus do angka naung nidokNa di ayat 23 i. Di ayat 24, manang ise na so olo agoan hosa ala ni Jesus, lapatanna na so olo mansoadahon dirina laho mangolu hombar tu lomo ni roha ni Jesus, tontu gabe agoan parsaoran ma ibana dohot Jesus i sandiri. Gabe agoan hangoluan na pinasipasuhon ni Jesus.
Di ayat 25 didok, ise na so rade “manuhuk silang” jala “ditulak” portibion, alai na mamillit gabe “berkompromi” jala “mardame” dohot portibion, asa boi omoanna portibion, gabe margabus ma ibana tu dirina, Ai dirimpu ma naung berhasil ibana dapothan hangoluan hape gabe agoan hangoluan na tutu (hangoluan na salelengni lelengna) i do ibana.
Di ayat 26 didok, ise na maila gabe siihuthon Jesus jala mabiar manghatindanghon na siihuthon Jesus do ibana, suang songoni na maila mangolu hombar tu Hata ni Jesus dohonon ni Tuhan i ma tu ibana sogot di na ro Ibana dibagasan hasangapon na di Ibana i “ndang huboto hamu manang sian dia” (pat: Luk. 13: 25-27). Alai ise na sanga maila jala mabiar manghatindanghon Jesus suang songoni nang na sanga mansoadahon Jesus dingoluna, disolsoli ma dirina, ro ma ibana mulak tu Jesus asa tibu ibana muse dijangkon Jesus mulak gabe siseanNa (taingot ma peristiwa ni si Petrus na mansoadahon Jesus pola sahat tu tolu hali – Luk. 22:54-62 pat. Rom 1:16)
Di ayat 26b, di dok do “di na ro Ibana dibagasan hasangapon na di Ibana”. Hata on martudutudu tu ari haroro ni Jesus paduahalihon, di na ro Ibana dibagasan hasangaponNa. Di ari i, uhumanNa ma saluhut pangisi ni portibion. Marhite hataNa on, Jesus sandiri manuriranghon haroroNa sogot di ari paruhuman i.
Dung i, di Ayat 27; marragam do penafsiran taringot tu ayat on. Huria na parjolo jotjot na memahami hata on marlapatan na adong dope sian nasida angka sisean i na mangolu di tingki haroroni Tuhani paduhalion (Joh. 21:23 pat. 2 Tes.2:1). Adong do na mangantusi hata on martudutudu tu ari “Hasangapon ni Jesus di dolok” ima na tarida di udut ni turpuk on (Luk. 9: 28 – 36). Adong do na mangantusi hata on martudutudu tu ari hananaek ni Tuhan Jesus tu banua ginjang, marhasangapon Jesus diida nasida tarhinsat tu banua ginjang diholipi ombun i dungi adong ma diida nasida jongjong di lambung nasida dua halak surusuruan parulos na marlinanglinang mamanghulingi nasida (Ul. 1: 9-11).
Adong muse do penafsir na mengkaitkan hata on tu peristiwa paskah manang peristiwa pentakosta. Lukas sandiri memahami hata sebagai satu kesatuan na paboahon ia Harajaon ni Debata ima sada realitas rohani, naung ro tu tongatonga ni portibion jala sedang berproses laho tu hasisinghopna. Ido umbahenna ditongos Jesus do muse angka siseanNa i laho mamaritahon Barita na Uli i tu sandok liat portibi on.
Ala ni i, Amang, Inang! Godang tiruan na denggan na binahen ni Tuhanta Jesus. Sian haroroNa di tongatonga ni halak na metmet angka na pampang laos patupa pangurupion di nasida, ragam na boi tiruon ni angka na porsea, ulahononna di ngoluna.
Dihirim do hita marhite turpuk on gabe siihuthon Kristus na rade manuhuk silang ariari, marhite na mangulahon angka ulaon dohot tanggungjawab maniruhon pambahenan ni Jesus na tongtong satia di parsuruon ni Ama i.
Gabe sitindangi ni Kristus ma hita, na tongtong satia manghatindanghon Ibana nang pe godang angka hasusaan, hamaolon, dohot parsorion na taadopi. Amen.
){kind=link}
0 Komentar