Huria na hinaholongan ni Tuhan Jesus Kristus, turpuk jamita di partangianganta di bodari on, i ma na tarsurat di 2 Kronika 9 : 1 – 8
Amang Inang, tarbarita do ia si Salomo songon sahalak raja na pistar, jala hantus di angka ragam ni aturan dohot partonding na ringkot laho manggomgomi sada harajaon. Boi dohonon hira so adong dope tudosan ni raja Salomo taringot tu na marhuraja molo tapahombar tu angka raja manang panggomgomi ni angka bangso si saonari on.
Molo di turpukta on, tarida do denggan ni panghobasion ni raja Salomo i sian panghatindanghonon ni raja boruboru sian Saba i. Alai di na laho pagashonhon turpuk on, ingkon manat do tutu hita, unang tarhurung di pangantusion na holan mamujimuji habisuhon ni si Salomo sambing jala holan patujolohon ibana di jamita. Gariada, songon nanidok ni raja boruboru sian Saba i, ingkon Debata do pujion, na pabangkithon si Salomo gabe raja.
Amang, Inang, ia hatauon ni si Salomo na pinasonggop ni Debata do i. Molo tajaha pigapiga hali turpuk Epistel on, tangkas do dipatorang ragam ni hatauon na adong di hadirion ni si Salomo songon sahalak raja na ‘manghobasi’ sadasada harajaon. Ai ala ni hatauon di ulaon na marragam i do tutu, umbaen na pola tarbarita ibana dohot tu raja boruboru sian Saba i. Malo do raja i patoranghon angka sungkunsungkun. Bisuk do ibana mangaturhon angka sipanganon di meja, mangaturhon partordingna molo hundul naposona (parhaladona).
Sandok, maruli hapistaran do saluhut parhalado ni si Salomo, jala maruli nang hata na uli sian angka na manghatindanghon taringot tu raja Salomo. Songon topik minggunta, boi ma dohonon, panghobasion na tau sitiruon do angka na pinatupa di raja Salomo i. Alai nang pe sai hira tapatujolo si Salomo dison, ingkon idaonta do, jala manat taparrohahon ise na pabangkithon Salomo gabe raja. Marhite hata na nidok ni raja boruboru sian Saba i, taboto do, Debata do na pabangkithon ibana. Ala ni i, Debata sandiri do na manongos saluhut ‘halobian’ na adong di diri ni raja Salomo, jala umbahen i do tama pujion ni raja Salomo, nang hita pe, Debata ala pambahenanNa i.
Huria ni Tuhanta! tarbahen Debata do hapistaran marolohon parangan na tongam. Sian panorangion ni ayat sada, tangkas do digombarhon songon dia haroro ni raja boruboru sian Saba i. Mardongan parangan na mansai tongam do ia ibana, jala mangusung ragam angka na hushus. Molo tapamanat pe muse mangida motivasi ni haroro ni raja boruboru i, naeng manguji raja Salomo do. Ai tangkas do didok “ro ma nasida tu Jerusalem naeng masiujian dohot si Salomo marundangundang”.
Boi dohonon, naeng botoonni raja boruboru i, haru olat ni dia nian hapistaran ni raja Salomo i. Alai di ujungna, nang pe mardongan parangan na torop jala tongam raja boruboru i, gabe tarmali tondi do nasida (ay. 4), ala marnida hapistaran ni raja Salomo i, na tontu pinatupa ni Debata do. Na adong hinan sangkap ni raja boruboru i patupa pangujian dompak raja Salomo, gabe patupa pamujion do di pudianna. Talu do tutu parangan na tongam i, binahen ni hapistaran na pinasonggop ni Debata di raja Salomo.
Amang, Inang! Dibahen Debata do ro pamujion sian na ‘manguji’. Adong do sada perubahan sikap na drastis terjadi di turpuk on. Sian na naeng manguji gabe tu pamujion. Sian na so porsea, gabe porsea. Dipangke turpukta on do tutu tokoh manang figur ni raja boruboru sian Seba on laho mangondolhon hahomion ni Debata na tuk pauba roha ni na so porsea gabe porsea, na so mamuji, gabe mamuji. Lam tarida ma tutu hahomion ni Debata di turpukta on, di na diboto raja boruboru i mandok pamujion tu Debata jala diboto ibana ise goar ni Debata sipujion ni si Salomo i.
Molo borhat hita sian hata aslina, Hata Heber, di ayat 8, hata YHWH na paboahon goar ni Debata, i do di pangke di turpukta i (eloheka Yahweh yehi / pinuji ma Jahowa Debatam). Ndada dompak si Salomo tutu pamujion ni raja boruboru i, alai dompak Jahowa Debata ni si Salomo i do. Ala ni i, dohonon ma, dipangke Debata do panghobasion ni naposoNa laho patubuhon haporseaon ni angka jolma na so haru porsea dope. Molo tardok pe marhobas sian nasa rohana si Salomo di turpuk on, ulaula ni Debata sambing do i, laho pasingkophon lomo ni RohaNa.
Amang, Inang! Ianggo panghobasion na tama ingkon na ‘parohon’ sangap di Debata do. Songon naung niondolhon di ginjang, dipangke Debata do panghobasion ni angka naposoNa asa lam martamba angka jolma na mamujimuji Debata. Songon si Salomo na dipangke Debata patupahon panghobasion na ummuli, gabe ro do martamba angka na mamuji Debata sian halak na so tardok mananda Ibana hian.
Amang, Inang! Marhite turpuk on diigil do hita asa mangasahon Debata ni ganup panghobasion di ngolunta siganup ari. Asa saluhut panghobasion na taula mangasahon Tuhanta i, tahirim gabe tau hasangapon di Tuhanta i, ndada di hita. Dung i, diigil do nang hita asa gabe habaoran ni angka pasupasu, nang angka hata nauli marhite saluhut na tahobasi, songon parhalado ni si Salomo na taruli di angka hata pasupasu nasida marhite pangulaan ni rajana i. Taloas ma Debata na marhuraja di bagasan dirinta. Jala molo tahaporseai do Debata na pabangkithon hita gabe naposoNa di ganup ulaonta be, ingkon Ibana do nang na mangarajai roha nang pingkiranta di tingki marhobas. Marhobas ma hita sian nasa roha na digohi Tondi ni Debata, asa unang manghirim hita di pamujion tu dirinta sandiri ala ni panghobasionta i.
0 Komentar