Khotbah Bahasa Batak: Judas 1:21 (Ramoti Hamu ma Dirimuna)

Judas 1:21

Ramoti hamu ma dirimuna di bagasan holong ni roha ni Debata! Maimaima ma hamu di asi ni roha ni Tuhan Jesus Kristus, asa sahat hamu tu hangoluan salelenglelengna.

Ia surat ni si Judas on, digurithon ibana laho mangapoi angka na marpili, angka na marungkil humongkop haporseaon. Alani i do, boho do tutu turpuk jamita sadarion tu sosososo ni topik ni minggunta na manaringoti haporseaon ni angka anak ni Debata. Mamungka sian ayat na paopathon laos sahat tu ayat duapulu sada na gabe turpuk jamita, dipatolhas si Judas do angka na ringkot sitimbangan, siparhusorhusoron, nang angka sipatupaon ni halak na porsea. Alai lam dasib ma tutu di ayat duapulu sada i, disungguli si Judas angka na porsea i, asa jamot nasida laho mangaramoti diri di bagasan holong ni Debata, jala asa maimaima nasida di asi ni roha ni Tuhan Jesus, dalan laho pasahathon nasida tu hangoluan salelenglelengna.

Songon naung tapungka masuk tu minggu minggu dung Trinitatis, sasintongna martaringot do turpuk jamita sadari on tu hasitolusadaon ni Debata. Molo taulahi muse manjaha sian ayat duapulu i, disuarahon si Judas do tu angka na porsea, na hinaholongan na i, asa martangiang nasida di bagasan Tondi Parbadia. Alani i do, trinitas manang hasitolusadaon ni Debata mansai nalnal do ditaringoti di turpuk sadari on. Dipatudu turpuk jamita on do tolunsa pribadi ni Debata rap dohot angka pangulaan-Na be di tongatonga ni hajolmaon; Debata marholongni roha, Anak-Na i marasi ni roha, jala di bagasan Tondi i hita pasahat tangiangta. Asa molo ditaringoti turpuk jamita sadarion pe taringot tu haporseaon songon topikni minggunta, haporseaon tu huaso dohot hagoon ni Debata sitolusada i do na hinataanna disi. Jala laos i do na margogoihon hita mangulahon molo adong na tinonahonni si Judas marhite jamita sadari on.

Alai tutu andorang so lam tapabagas turpuk jamita sadarion, ringkot do botoonta aha do sada sibonsirini pangguriton ni si Judas di suratna on. Ala naung adong do tutu deba halak angka na marulahon na so tama, na boi mambahen ganggu rohani angka halak na porsea. Mansai tangkas do digombarhon si Judas songon dia tudosan ni angka halak na deba na manisipi na hinataan na i. Digombarhon do songon Sodom dohot Gumora dohot lan na asing panggombaron ni jolma na so tama ihuthonon ni angka na porsea i. Borhat sian i do dimulai si Judas sosososo na tu angka na hinaholongan na i mamungka sian ayat na pasampulupituhon i. Dipungka si Judas do tutu sidohononna i marhite na manaringoti angka apostel naung parjolo mangalumbahon angka hata na ringkot pahusorhusoron ni na porsea i.

Aha do tujuanni si Judas marsuru angka na porsea i asa mangaramoti dirina? Tontu, songon na tinonahonni topik minggunta, asa gabe anakni Debata do hita marhite haporseaonta i. Songon sada anak na pajonok dirina tu amangna di tingki jumpang hasusaan dohot hamaolon, songoni ma nian hita na porsea i, pajonok dirinta tu Ama i, marhite Anak-Na nang Tondi-Na i. Hata pajonok na pinangke di turpuk jamita on, sada ekspresi manang tindakan refleksif do on di tongatonga ni halak na porsea. Pinangke pe hata on asa lam tangkas do tarida imbar ni halak na porsea dohot na so porsea, suman ma i tu halak na olo pajonok dirina, dohot na so olo pajonok dirina. Songon dalan pajonok diri hita, diapoi si Judas do, nang tu hita pe na jumaha jamita on, asa ramot hita di dirinta marhite na manjangkon holong ni roha ni Debata mian di bagasan hita. Ditonahon do nang asa mananda hita di hadirionta songon halak pardosa na holan mangasahon asini roha ni Jesus Kristus sambing di parngoluanta siganup ari, jala asa tapangido tondi i marhite tangiangta. Alani i do, ndang holan haporseaon na niigil ni turpuk on mangolua jala marparbue di parngoluanta, alai dohot do nang haserepon ni roha marhite na mananda hita di dirinta songon halak pardosa. 

Di pangujungi ni ayat duapulusada on, dihatai si Judas do taringot tu hangoluan salelenglelengna. Sian hata “asa” na pinangke ni si Judas dison, boi do tardok hita, adong do situjuonni na manjaha turpuk jamita on, molo dung diula nasida songon naung tinonahonna di ayat duapulusada i. Ala, molo marhite sian lapatanni hata, jotjot do dipangke hata “asa” laho patuduhon tujuan, tindaklanjut, manang dampakni kalimat andorang so hata “asa” i. Molo marguru tu parsiajaran teologi adong do sada ilmu na manghatai taringot tu na masa sogot, manang ari na parpudi, ima eskatologi. Alani i do, adong do sisi eskatologis na so pola talu ringkotna patolhashonon di turpuk jamita on. Adong do tutu situjuonta molo dung salpu ngolu on, jala molo dung dapot ari na binuhul ni Debata, na so hasuaraan ni angka jolma na di portibi on. 

Alai di na maimaimahon hangoluan salelenglelengna i hita, tutu ingkon adong do na taula di parngoluanta on, andorang so ro ari na i. Lapatanna, ndang boi hita paimahon secara pasif. Songon na nidokni angka dongan na deba, “Ro nama arini Debata, tapasidung ma sude ulaonta, hohom ma hita. Martangiang ma hita duapulu opat jom sadari.” Tung dao ma hita sian angka sisongoni. Ai molo tatorushon pe manjaha surat Judas on, ditaringoti ibana do aha na boi tarula hita di na maimaima i hita. Di ayat duapulua dua nang duapulutolu, ditonahon do tu angka na porsea i asa ajarannasida angka na ganggu roha i, songon dalannasida “bermissi” molo martaringot hita muse tu ari hananaekni Jesus na marsuru hita gabe parbarita nauli di humaliangta. Molo nunga hot haporseaonta, nda tama ma hita mangurupi donganta na deba, asa lam hot nang haporseaonnasida, songon parbueni haporseaonta i? Di konteks ni surat Judas on, ditaringoti do i. Disuru do hita angka na porsea i, asa paluahon dongan angka na ganggu roha i, marhite na manorangi pingkiran nasida, manungkolnungkoli nasida. Asa dapot tutu songon tujuan ni si Judas manggurithon turpuk on, asa lam torop bilangan ni na porsea, na mandao sian angka pangalaho na hombar tu keadaan di Sodom dohot Gumora i.

Nunga tarida sangombas di ginjang taringot tu ama dohot anakna nangkin pinatorang di turpuk jamita on. Nuaeng tajou ma muse panggombaron i asa gabe ondolanni jamita sadarion. Didok topik minggunta, gabe anakni Debata ma hita ninna. Molo gabe anakni Debata, lapatanna, saotik nama imbarta sian Jesus i, nda i do? ai Tuhanta Jesus Kristus pe tong do Anakni Ama i. Naeng dohononna disi, songon Jesus na pajonok diri-Na tu Ama i na marsuru Ibana, ditogihon do hita nang pajonok dirinta tu Ama i, songon na binahen ni Jesus i. Marhite angka pambahenan songon naung nihataan di ginjang, isarana taringot tu pahot haporseaon, nang mangurupi dongan pahot haporseaonna, ido dalanta patuduhon parsitutuonta pajonokhon diri tu Debata. Marhite sian pambahean i do tutu tarida na marsitutu hita naeng pajonokhon diri tu Ibana. Gabe anakni Debata ma hita tutu, saguru tu lomo ni roha-Na. Dipargogoi jala dipatau ma hita mangulahon saluhutna i. Amen!