2 TIMOTEUS 4:7
Khotbah adalah salah satu tugas penting yang harus diemban oleh seorang pelayan Allah, dalam hal ini Guru Huria. Oleh karena itu, sejak menerima pendidikan di seminari, ilmu berkhotbah merupakan salah satu ilmu yang terpenting yang harus diajarkan kepada para mahasiswa. Dalam konteks Seminari Sipoholon, para mahasiswa yang dididik adalah mereka yang siap melayani di manapun, secara khusus di daerah pedesaan, di mana budaya Batak masih kental.
Oleh karena itu selain dilatih untuk berkhotbah dalam bahasa Indonesia, kami, para mahasiswa di Seminari Sipoholon juga dilatih (terutama) untuk berkhotbah dalam bahasa Batak. Pak Demak Simanjuntak, Ketua STGH, sekaligus dosen yang mengampu mata kuliah Homiletika II, kerap melatih kami untuk berkhotbah dalam bahasa Batak. Beliau pernah membagikan beberapa jurus untuk menyusun serta 'melakukan' khotbah, atau sebut saja berkhotbah.
Kali ini, saya akan membagikan satu teks khotbah yang pernah saya susun untuk memenuhi salah satu syarat latihan berkhotbah. Khotbah yang saya bagikan adalah dalam bahasa Batak. Saya masih ingat, saat tugas ini diberikan, pak Demak membagi kami, pengontrak mata kuliah Homiletika II ke dalam dua kelompok, yakni kelompok yang membuat khotbah untuk konteks suka cita, dan konteks duka cita. Saya masuk dalam kelompok yang menyusun khotbah dalam konteks duka cita.
Berikut khotbah yang saya susun waktu itu.
Damang dainang na hinaholongan ni Tuhanta Jesus Kristus, ia turpuk jamita di hita sadari on nienet ma i sian 2 Timoteus 4:7. Hujahahon ma di hita, songon on ma didok: “Nunga hupasidung paraloan na denggan i, nunga hupaujung parlojonganki; ramot hubahen haporseaon i.” Ido sahatna.
Damang dainang, aha do na ro tu pingkiranta molo dihatai taringot tu hamatean? Tutu do i amang, inang; ra godang do sian hita na mandok mabiar tu hamatean. Deba sian hita muse mandok: “ndang rade dope rohangku Tuhan, unang ma jolo jou ahu.” Deba nari mandok: “jolo mamora ma jo ahu, Tuhan. Jolo gabe ma jolo ahu di parpinomparon; maranak, marboru, marpahompu sian anak, marpahompu sian boru. Dungkon ni i pe asa jouonMu ahu nian, Tuhan.” Angka pandohan sisongoni jotjot dope dipeop halak hita Kristen, lumobi halak Batak. Molo sian hajolmaon nian, patut do mabiar jolma tu hamatean, ai so adong na umboto tingki sadihari do ro hamatean i. Ai songon panangko borngin do harorona. Di tingki sonang sahalak nampunasa jabu peak di podomanna, olo do tompu ro panangko naeng manodong ibana huhut mambuat sude angka na adong di bagasna i. Songon i do tong nang haroro ni hamatean i, amang inang. Jotjot do di tingki sonang tahilala, dang adong nian parsahiton alai mamintor ro hamatean i so tarbotoboto. Tung holan Tuhanta i do na umbotosa. Angkup ni i tangkas ma taboto ia hamatean i huaso ni Debata sambing do i; Ibana do na mangatur partingkian ni saluhut jolma. Guru di ibana do atik sadihari pe jolma i jouonNa. Ala ni i damang dainang tatulak do haporseaon ni na deba na mandok diboto nasida do andigan haroro ni ajalna. Martontangan do i tu haporseaon na tapeop.
Damang dainang na hinaholonganni Tuhanta Jesus Kristus, ia turpukta sadarion, naeng manaringoti taringot tu hamatean i do. Alai nian, ndang na hamatean i naeng ondolhononni si Paulus di turpukta on. Baliksa, parngoluan andorang hamatean do siondolhonononna. Ia surat Timoteus na paduahon on amang inang, on ma surat na tinongosni si Paulus tu anakna di bagasan haporseaon i, ima si Timoteus. Di surat on, songon donganni si Paulus si Timotius laho mamaritahon barita na uli tu huria-huria na parjolo isarana di Efesus, mansai ringkot situtu do dihilala rohani si Paulus nian naeng pasahat panogunoguon nang poda pe tu si Timoteus, anakna i. Tambani i, dipasahat si Paulus do nang angka parsiajaran na naeng pasahotonni si Timoteus tu huria na hinobasanna. Songon i do nang di turpukta sadari on amang, inang. Di bindu opat on, dipodahon si Paulus do asa jamitahonononni si Timoteus nian hata ni Debata manang sadihari pe. Dipodahon do nang asa unang mabuk rohani si Timoteus. Ia di ayat papituhon, ima na gabe jamita di hita, diondolhon si Paulus ma marhite panghatindangionna; naung dipasidung ibana paraloanna na denggan i, naung dipaujung parlojonganna; jala ramot haporseaonna i dibahen. Dirajumi rohani si Paulus do naung jonok nama ajalna (ay. 6) alani i, pos do rohana, na lehononni Debata di ibana tumpal hatigoran. Alai ndada holan tu si Paulus dilehon Debata tumpal hatigoran i, tung saluhut do tahe tu angka jolma na manghaholongi hapataronNa i.
Aha do naeng dohononni si Paulus di turpukta on amang inang? Aha do hubunganna tu hamatean naung tataringoti nangkin? Damang dainang, na hinaholonganni Tuhanta Jesus Kristus, digombarhon si Paulus do ia parngoluon on ima songon na marlojong, manang tadok ma i pertandingan lari manang maraton. Anggo di turpukta, didok ma i paraloan. Hita songon angka na ‘marlojong’ di bagasan paraloanta manang parngoluanta on, ingkon sahat do hita tu garis finish manang ujung ni parlojongonta. Nuaeng sahat ma sungkun-sungkun on tu hita. Aha do na taula di tingki paralaon i? Tutu do hita marlojong dohot denggan, manang dang sian ias ni rohanta na marlojong i? Anggo di si Paulus, tangkas do didok, ia ibana nunga dipasidung be paraloan na denggan i, nunga dipaujung ibana; angkup ni i, ramot dibahen haporseaonna i. Nata pe di mula na i, dipaporsukporsuk si Paulus do angka na porsea, manang halak Kristen na parjolo, alai baliksa di ujungna mulak do ibana gabe marbarita nauli muse pabotohon taringot tu hata ni Debata tu saluhut bangso na so tumanda Kristus dope.
Damang dainang na hinaholonganni Tuhanta Jesus Kristus, ia surat ni si Paulus on na tinongosna tu si Timoteus sahat ma nuaeng tu hita, jala tajaha sadari on. Songon hita angka halak na porsea di Tuhanta Jesus Kristus, andorang so sahat dope hita tu garis finish na ginombarhon songon ujung ni parngoluan, ima tu hasonangan hamatean i, taalusi ma jo di bagasan rohanta be. Nunga tapangke tingki na nilehonNi Tuhan i dohot denggan laho mulaulaon? Nunga tapaujung paraloan na denggan i? Ia di si Timoteus didok si Paulus do asa borhat ibana manjamitahon hata ni Debata huhut manghajongjongkon i di ganup tingki. Alai ndada holan tu si Timoteus i amang inang. Hita pe, songon halak na porsea hita, adong do tanggung jawab di hita ima di na laho parsidohot mamaritahon barita na uli i, hata ni Debata. Di naung dibasabasahon Tuhanta i tu hita godang tingki, ganjang ni umur, nang angka siadongan songon naung nilehonna tu angka apostel na ujui, isarana si Paulus, naeng ma nian adong respon sian hita taringot tu silehonlehon i, manang dalanta manghamauliatehon silehonlehon i. Aha do bahenonta amang inang di na laho mangisi ariari ni ngolunta naung nilehon ni Tuhan i? Ima tutu, dohot ma hita manjamitahon hata ni Debata, jala manghajongjongkon i di ganup tingki, mulai sian kelompok na metmet i ma di tongatonga ni bagasta, manang di tongatonga ni keluarganta. Songon halak natoras hita amang inang, boi do hita gabe parjamita di bagasta be. Boi do paingotonta angka ianakhonta i di hata ni Debata ima isarana marhitehite poda na talehon siganup ari, manang di na rap manjaha bibel, dohot rap martangiang hita di bagasta pe.
Aha dope amang inang na boi taulahon andorang so sahat hita tu garis finish i? di ayat lima didok ma i, taon ma na jat i; radoti na tama ulaon ni parbarita na uli; sahat ula tohonanmi. On ma poda na tung mansai ringkot peoponni halak Kristen saleleng mangolu ibana. Nuaeng amang inang, sahat ma poda on tu hita. Andorang so sahat hita muse tu hasonangan hamatean i, songon ama na tahaholongi naung peak nuaeng di adopanta dison, dipaingot si Paulus hita muse asa olo hita manaon na jat di na manaripari parngoluon on hita. Ra ingkon taakui do, amanta na tahaholongi naung peak nuaeng on, ra di tingki parngoluonna pe diadopi angka na jat i. Hita pe songoni do amang inang, di na mandalani parngoluon on dope hita, taadopi do angka na jat, angka tantangan di parngoluonta. Alai dipodahon si Paulus ma hita, jala huulahi ma muse mandok, na ingkon rade ma hita manaon na jat i; udut na i, taradoti ma na tama; ima angka ulaon nang parange na tama siulahononta dohot sipatuduonta. Angkup ni sahat ma taula tohonanta. Amang inang, ndada holan Pandita, Guru Huria, Bibelvrouw, Sintua, manang Diakones asa gabe partohonan. Nang hita pe, asingni na hugoari nangkin, partohonan do hita di ganup ulaonta. Ala ni i, naeng dohonna disi, asa sahat taulahon sude angka ulaon na pinasahat tu hita, marhitehite parkarejoan di kantor manang na asing. Paima so sahat dope hita amang inang tu hasonangan hamatean i, paradianan parsatongkinan i, tole taulahon angka naung pinodahonni si Paulus on tu si Timoteus nang tu hita tarlumobi.
Hita angka na tinadingkon ni ama na tahaholongi dison, naeng dohonon tu hita, asa hita pe taulahon ma angka na denggan, songon naung diulani amang on nasailaon uju di ngoluna. Binsan dilehon Debata dope di hita tingki parasian, tingki lao mulaulaon, ua tapangke ma i dohot denggan amang inang. Taulahon ma marbarita na uli di keluarganta, laho mangaradoti angka na tama, jala mangulahon saluhut angka siulahonon na pinasahat tu hita. Ia dung mulaulaon hita dohot denggan, naung mangulahon na tama ma hita di si. Ai tama do hita mangula angka na pinodahonna i, songon dalanta mandok mauliate tu Debata di tingki naung dilehonnai, andorang so sahat dope hita tu hasonangan hamatean i.
0 Komentar