Amang, Inang, Huria na hinaholongan ni Tuhan Jesus Kristus! Buku Ester i ma sada buku di Padan na Robi na manaringoti taringot tu ngolu ni si Ester dohot Mordekai, halak Jahudi na mian di tongatonga ni sada harajaon Persia. Marnida uli ni si Ester, di sada tingki dipillit raja i do ibana gabe jolmana dungkon disirangkon ibana jolmana na parjolo i. Di lambung ni raja i, adong ma sahalak na margoar si Haman. Tudos tu penasihat ni raja i do ia si Haman. Siala sogo ni rohana mida bangso Jahudi i, lumobi dung diida ibana di sada tingki ndang olo si Mordekai marsomba ibana songon halak na asing, lam marsigorgor ma rohana naeng mamunu bangso Israel. Hape di tingki na asing, so pamotoan ni si Haman, hea do disada tingki tarbege ni si Mordekai tahi ni pigapiga halak di tongatonga ni harajaon i naeng mamunu raja i. Umboto saluhut na masa i, marbisuk do si Ester.
Huria ni Tuhanta Jesus! Sada sian alasan ni raja i mamillit si Ester gabe jolmana i ma ala uli ni rupana. Siala ni i, laos on do dipangke si Ester dalan ni ibana laho mangido sipangidoonna sian raja i. Dipangke si Ester ma pangkean harajaon laho mangadop raja i. Marnida i, lomo ma roha ni rajai tu si Ester jala disurdukhon raja i ma tungkot harajaon sere na di bagasan tanganna. Laos dipajonok si Ester ma laho manjama tungkot i.
Ndada manigor dipasahat si Ester sipangidoonna tu raja i, dungkon disungkun raja i dia na hurang di ibana. Alai dipio ibana do raja i rap dohot si Haman tu panggalangon na pinaulina. Didok roha ni si Ester uli ma nian dison pangkeon ni ibana tingki laho pabotohon tu raja i. Haporseaon ni si Ester dohot raja i sama nasida na tubu sian na tumangihon i do. Ditangihon si Ester na pinangido ni raja i, i ma marhite na ro ibana dohot pahean lomo ni roha ni raja i, baliksa, raja i pe tangi do di nanidok ni Ester i, jala marjanji do ibana pasautonna nasa na pinangidona i.
Dung dipio si Ester raja i dohot si Haman jala dung sun minum anggur nasida, dipasungkun raja i ma muse si Ester aha pinangidona, jala didok do, intap ni satonga ni harajaon on lehonon do tu ibana. Laos dialusi si Ester ma muse asa marsogot na i patupaonna na songon nanidok ni raja i.
Ala ni i, angka dongan! Nang pe ndang adong hata “Debata” manang “Tuhan” ditaringoti di buku Ester on, alai molo tajaha manat boi do idaonta na mangula Debata di bagasan hahomon. Habisuhon ni Debata na tarida sian panghataion, pambahenan, dohot parange ni si Ester i do na tinangihon ni raja i. Jala dohononta ma, marhite sian i do ro haporseaon ni raja i tu si Ester nang tu Debata na hinaporseaan ni si Ester.
Dipangke Debata do hita asa marbisuk mamangke sipareonta dohot denggan. Ndada sude na tatangihon i ringkot tu haporseaonta. Alai marbisuk do hita dibahen Debata mamillit na tau sitangihononta gabe mambahen martambatamba haporseaonta.
Sai gabe halak na burju ma hita manangi. Jala dumenggan songon na nidok ni na pistar i. Girgir mananginangi, bangkol manghatahon.
0 Komentar