Nunga Sesa Angka Dosami: Khotbah Bahasa Batak untuk Partangiangan Minggu Judika

Huria ni Tuhanta! Psalmen 120 – 134 ima bagian ni Buku Psalmen na marisihon angka ende taringot tu tangiang elekelek ni bangso Israel na di bagasan panghirimon laho manangkohi bagas joro di Jerusalem. Ido umbahen, ende hananangkok didok laho mamonai ganup bindu ni buku i. Di hata aslina, Hata Heber didok ma ende hananangkok on: Shir Hama’aloth, jala di Hata Inggris didok Songs of Ascent. Didok pe “hananangkok” ala memang uju rap mardalan bangso Israel laho mamongoti Jerusalem, ingkon manangkohi dolok Sion do nasida. Ala ni i, angka ende pujipujian ni bangso i na patuduhon panghirimonna tu Jahowa, gabe didok ma ende hananangkok. Di turpuk Psalmen 126 on, ditaringoti do balga ni pambahenan ni Jahowa tu bangso i, pola do gabe marhilas ni roha jala marolopolop bangso i.

Amang, Inang! Sian pandohan na parpudi di ayat 1 i, na mandok “doshon halak na marnipi do hita”, dipatuduhon do paboa na balga situtu do pambahenan ni Jahowa, jala ndang tarpingkiran ni bangso Israel boi manjadi sisongoni. Umbahen i do didok gabe doshon halak na marnipi, ala molo di parngoluan siganup ari, tung godang do angka na so tarpingkiran, na didok roha ndang jadi masa di ngolu on, holan di nipi samping do boi masa. Alai hinorhon ni habalgaon ni Jahowa, tarbahen Ibana do manjadihon angka na “somal masa holan di nipi” gabe masa di hangoluan na nyata. Ninna roha ni bangso i, tudos tu na marnipi do dipingkiri nasida parmulaknasida sian habungan i. Alai masa ma halongangan binahen ni Jahowa gabe ndang holan di nipi be na dipingkiri bangso i taringot tu hamumulaknasida, alai tutu situtu do mulaknasida tinogihon ni Jahowa. 

Amang, Inang! Adong do perubahan na masa di bangso Israel dungkon ditogihon Ibana mulak bangso i sian habuangan. Jala molo jinaha turpuk on, di pigapiga ayat dipatuduhon do perubahan i, alai mansai tangkas do dipatuduhon, ia na maruba, i ma arsak ni roha gabe las ni roha. Sian na tarbuang (ay1, 4), mariluilu (ay5), huhut tangis (ay6), gabe mulak do muse (ay1), jala marolopolop (ay2,5,6), huhut marhilas ni roha situtu (ay3) dibahen Jahowa. Tamba ni i muse, dung dibahen Jahowa sisongoni tu bangso i, gabe gok parengkelon ma bangso i marningot i, huhut mardalannasida, manangkohi dolok laho bongot tu Jerusalem.

Habuangan na niadopan ni bangso Israel ndada sirang sian hadosaon na niula ni nasida. Hinorhon ni dosa i do umbahen na tarbuang bangso i. Di turpuk on, di naung mulak bangso i tinogihon ni Jahowa, martudutudu do i naung marpamuati roha ni Jahowa di nasida songon na sinoarahon ni topik minggu i: “Nunga Sesa Dosam”. Andorang so ditogihon Jahowa bangso i mulak, nunga hona uhumnasida, jala nunga diluluhon Jahowa saluhutna pambahenannasida na so hombar tu lomo ni rohaNa. Ido barita ni Minggu Judika na tarida marhite turpuk on, paboa naung diluluhon Jahowa bangso i marhite pambahenan ni bangso i jala marguru tu asi ni roha ni Jahowa na sai manongtong tu portibi on.

Di pangujungi ni jamita on, dohononhu ma asa tabilangi jala tahalashon ma angka pambahenan dohot halongangan na binahen ni Jahowa na masa di tongatonga ni ngolunta na jotjot mambahen hita songon na marnipi. Tadok ma mauliate jala sai marolopolop ma hita binahen ni i. Nang pe jotjot hamaolon na taadopi ndada hinorhon ni dosa, alai ndada gabe soada panghorhon ni dosa i tu angka na taae. Sipata, tung ala ni dosa i do hita mangae na hansit. Ditogihon ma hita asa mangido, anggiat diluluhon Debata hita hombar tu angka na taula, jala sai marpamuati rohaNa mida hita. Na parpudi, tahangoluhon ma pambahenan ni Debata marhite hasesaan ni dosanta di angka ulaonta ganup. Di angka ngolunta marsadasada, sai marolopolop ma hita mamuji Debata naung manesa dosanta.