Bahan Sermon HKBP Distrik IV Toba: Turpuk Jamita tu Minggu Exaudi, 1 Juni 2025

Patujolo    
Psalmen 97 i ma sada sian angka “Psalm of Enthronement” manang Mazmur Kerajaan / Mazmur Penobatan di Hata Indonesia jala Psalmen Harajaon di Hata Batak. Ia unok ni Psalmen Harajaon i ma manaringoti Jahowa songon Raja di atas ni sude raja na adong di portibi on. Didok pe Mazmur “penobatan” ndada na mandok raja na ‘imbaru’ Debata. Alai, na naeng ondolhononna i ma taringot tu angka panghatindanghonon dohot pangokuhonon ni angka jolma na Debata do marhuraja marhite huaso, hasintongan dohot hamuliaon-Na. 

Sian bona ni turpuk on pe, i ma di ayat 1 tarida do rumang ni turpuk on songon Psalmen harajaon. Marhite pandohan na “Jahowa do raja…” di ayat 1 manang di bona ni turpuk on, martudutudu do i, na barita taringot tu harajaon ni Jahowa do na rumingkot siondolhononna di turpuk on, laos i ma na patuduhon rumang ni turpuk i songon Psalmen Harajaon, Mazmur Kerajaan, manang Psalmen of Enthronement.

Taringot tu Minggu Exaudi, i ma sada minggu di parsitongaan ni Ari Hananaek ni Tuhan Jesus dohot Pentakosta. Sian pangantusion ni liturgi, di Minggu Exaudi ma maimaima angka na porsea di hagogok ni pangulaan ni Debata Sitolusada.  Dung hehe jala manaek Kristus, maimaima ma angka na porsea di hagogokna i marhite na saor Tondi ni Debata tu angka na porsea i ma di Pentakosta dunghon salpu Exaudi. 

Jahowa Debata songon Raja dibaritahon di Minggu Exaudi hira naeng manungguli angka na porsea; Di minggu dunghon manaek Kristus alai ndang dung dope saor Tondi Parbadia, ndada na gabe tading portibi dohot sude angka pangisina on soada panggomgomi. Alai margomgom do Jahowa songon Raja, ala ni i, ndada gabe maimaima angka na porsea di bagasan ketidakpastian.

Hatorangan ni Turpuk

Jahowa do Raja
Hombar tu topik minggu; Jahowa do Raja, turpuk on pe dibonai do marhite pandohan i. Di Hata Heber hata malak do dipangke, na marlapatan to be or become king manang to reign (gabe raja manang laho marhuaso). Ala ni i, na tutu situtu do Jahowa gabe raja songon angka raja na di portibi on; gariada tumimbo tahe sian angka raja sisongoni. Sian udut ni pandohan i pe di ayat 1, dipatuduhon do panghorhon ni situasi Jahowa do Raja, i ma na gabe marolopolop do tano on jala marlas ni roha pulopulo angka na lan i. 

Marudut sahat tu ayat 6 pe, boi do idaon panghorhon ni harajaon ni Jahowa di tano on, jala molo mulak muse tu barita panompaon, laos angka na tinompaNa di mulana i do muse umpuji Ibana dohot harajaonNa. Angka ombun, api, hilap, dolok, dohot langit i do na mamuji Jahowa songon Raja Ibana sian angka raja ni portibi on.

Panghorhon ni Jahowa do Raja
Adong ummotikna tolu siparrohahonon sian barita Jahowa do Raja. Na parjolo i ma, olopolop tu angka partigor (ayat 1), na paduahon panguhumon tu angka na jat (ayat 7) jala panjouon asa manomba jala manghaholongi Jahowa songon sada Raja na sumintong huhut manghagigihon na jat. 

• Marimbar do olopolop dohot las ni roha. Olopolop na nidokna di ayat na parjolo ndada holan borhat sian “keadaan” songon angka pengalaman na mambahen sonang manang las roha. Ala ni i sumurung do olopolop i, ala borhat sian hasintongan na so maruba do paboa na tongtong dope marhuraja Jahowa jala mian di habangsaNa. Di hata asli na pe, hata rejoice do dipangke molo dilapati di Hata Inggris, ndada happiness. Asa umbagas do lapatan ni rejoice sian happiness di pamangkeon secara biblikal. Ihut tusi, na marolopolop siala Jahowa do Raja ndada holan sada horong ni jolma isara ni bangso Israel, alai, tano on do. Lapatanna, sude do tano on manang portibi on, ro di sude pangisina manghilalahon panggomgomion ni Jahowa songon Raja.
• Parsombaon tu debata sileban, sisomba ajiajian, ganaganaan nang na papujipuji dirina sandiri; i do angka na naeng pasaehonon ni Jahowa songon Raja Ibana. Hona uhumNa do angka siula sisongon i. Marhite hauurukna (hailaonna) do Jahowa patuduhon na so margogo do angka huaso ni debata sileban dohot na asingna i na nihataan na di ayat 7 i. Holan Jahowa do na marmulia sian angka raja, sian angka debata sileban. Jala ingkon holan tu Ibana do sude marsomba, gariada dohot do debata sileban i marsomba tu Debata Jahowa.
• Di tolu ayat pangujungi ni turpuk on, martingting do parPsalmen dompak angka na manghaholongi Jahowa. Di ayat 10, ditogihon do asa laos dihagigihon nasida angka na jat, jala adong do sada jaminan paboa diramoti Jahowa do nasida sian angka i, jala paluaonNa do nasida.  Di ayat 11 dohot 12 dipabotohon do angka siulaon dohot jambar ni halak partigor. Marsorinsorin dipabotohon do paboa na tarsabur do hatiuron di nasida dohot di angka na unjur marroha, jala dibahen marlas ni roha ma nasida di bagasa Jahowa huhut umpuji goarNa na badia i.

Hahonaan tu Jamita

Exaudi, Domine, voceam meam
Keadaan di Minggu Exaudi – i ma masa dunghon manaek Kristus jala andorang so saor Tondi ni Debata – manguji haporseaon ni angka jolma do. Porsea dope na tongtong Debata rap dohot nasida nang pe ndang disi be Ibana secara fisik marhite Jesus jala ndang dope ro secara rohani marhite Tondi Parbadia. Dibahen i do, marsoara ma angka na porsea asa ditangihon Debata soarana; soarana na maimaima di bagasan haporseaon. Borhat sian Psalmen 27:7 na mandok “Dengarlah, Tuhan, seruan yang kusampaikan” (Hata Latin: Exaudi, Domine, vocem meam), marsoara ma angka na porsea mangidohon pandonganion ni Debata. 

Jahowa do Raja
Marhite turpuk minggu dohot topik minggu diarahon do panandaion ni angka na porsea tu Debata asa mangarajumi Ibana songon raja. Sada barita na mansai tangkas do i paboa nang pe secara fisik ndang rap be dohot Jesus ala naung manaek Ibana jala secara rohani ndang dung dope saor Tondi ni Debata, alai ro do Debata songon raja ibana tu tongatonganta. Alus ni soara ni angka na porsea na mandok exaudi domine  i do barita ni minggu on marhite turpuk dohot topik mingguna. 

Asa gabe sada sitiopon do on di halak na porsea na paimahon hasasaor ni Tondi ni Debata. Di na maimaima i pe nasida, ndang na gabe soada na rap dohot nasida. Di tongatonganasida do Jahowa songon raja Ibana. Jala molo diuduti muse marhite haporseaon di hakristenon na parpudi on, dirajumi do Debata omnipresent manang mahahadir. Ala ni i do, sada siondolhonon di minggu on marhite turpuk on i ma na hadir do Debata, nang pe naung hehe Jesus jala maimaima di Tondi ni Debata. 

Bahkan, di kehadiranNa i, gabe songon Raja do Ibana, na manggomgomi, na mangalehon hadameon, na mamboan las ni roha di tongatonga ni bangsoNa. Molo binoan muse tu partingkian sinuaeng dunghon mangerbang hakristenon i, nang pe na so rap be dohot Jesus secara fisik, alai tahaporseai do, paboa huria i pe songon pamatang ni Kristus, tong do i representasi ni Debata. Asa molo sian poda parjamitaan na mandok ingkon sahat parjamitaan manaringoti Kristus i muse, boi do dohonon angka huria i, songon pamatang ni Kristus i gabe tanda kehadiran ni Debata di tonga ni angka ruasna di minggu Exaudi on. 

Sipahusorhusoron

• Borhat sian goar ni minggu Exaudi, tongtong ma “tasoarahon” haporseaonta. Lapatanna, sai girgir ma hita pasahathon soaranta tu Debata songon tanda ni haporseaonta. Alai huhut ma tahaposi Ibana di ngolunta on, gariada songon panghaposion ni sahalak jolma maradophon panggomgomion ni Raja na manarihon ibana, songon i ma panghaposionta.
• Songon pamatang ni Kristus, naeng ma dohot huria i gabe ulaula ni Debata manubuhon haporseaon, dohot panghirimon na mangolu di angka ruas ni huria, lumobi di minggu exaudi on, na martaringot muse tu na paimahon hasasaor ni Tondi Parbadia. Asa di bagasan haporseaon dohot panghirimon i saluhut ruas paimahon manang aha pe sangkap ni Debata di tongatonga ni ngolu hajolmaon.