Huria na hinalongan ni Tuhan Jesus Kristus, masuk tu horong panurirang na metmet do buku Joel on. Ia isi ni buku on, i ma panurirangon tu tongatonga ni Bangso Israel dung mulak sian Habuangan Babel. Lapatan ni Joel i ma: Jahweh adalah Allah. Marhite Panurirang Joel, dipaingot Debata bangso i asa mulak tu dalan ni Debata Jahowa (bertobat) sian nasa pangalaho angka na so hinalomohonNa, asa tongtong satia nasida mangulahon parsombaon na sintong di joro ni Debata.
Sian parmulaan ni bindu 3, i ma di ayat 1 (…”pangusehonongku ma Tondingku…”) tarida do ia turpuk on manaringothon taringot tu hasasaor ni Tondi tu saluhut bangso i (anakmuna dohot borumuna) laho manurirangi. I do sian turpuk epistel on na patuduhon konteks Pentakosta songon goar ni Minggu na naeng ro.
Amang, Inang, diusehon Debata TondiNa tu ganup jolma. Konsisten do Jahowa di sangkapNa ima asa gabe pasupasu Bangso Israel di angka bangso humaliang nasida (1 Musa 12:1-3). Asa tulus i didok Debata ma “pangusehononHu ma TondingKu....”. Hira udan tipotipo na mangalantap, songon i ma Debata Jahowa mangusehon TondiNa tu jolma, gabe sude hadirion ni jolma i digohi Tondi ni Debata.
Tondi i do na mangalehon hagogoon tu jolma laho mangadopi angka na masa, dohot pangantusion mangalapati angka uhuman na pinatupa ni Debata. Diusehon Debata Jahowa do TondiNa tu nasa sibuk (jolma), ndada holan tu horong ni angka malim dohot panurirang. Marhite on dialo do angka pingkiran dohot pangalaho ni angka malim di tongatonga ni bangso Israel na patimbohon dirina jala na menganggap dirina umbadiaan sian halak na asing, jala na mandok halak na asing ndang tau manjalo Tondi ni Debata. Laos dipahantus ma muse marhite hata “tu nasa sibuk”.
Huria ni Tuhanta! Di turpuk on dipatorang do angka na masa songon patujolo ni ari ni Tuhan na songkal i. Debata Jahowa do na pamasahaon angka i, ndada holan gerakan alam sambing songon na nidok ni torop angka parhapistaran. Ala Debata Jahowa do na manompa portibi on dohot nasa pangisina, Ibana sambing do na boi pahusorhon manang aha pe.
Ulaon ni jolma ima marnida, mamparateatehon huhut mangantusi angka na masa i hombar tu pangajaraion ni Debata, alai simo do (samar-samar) jala tersembunyi do i di parnidaan ni angka naso porsea (Mark 13:1-37). Di Bukku tolu Evanggelium i, on do muse na sinurathon na sida ima lumba lumba ni Jesus tu angka siseanNa taringot tu angka na naeng masa andorang so haroro ni Kristus i, jala dipaingot nasida asa tangka mamparateatehonsa.
Amang, Inang! Malua do ganup jolma na manjouhon goar ni Tuhan i. Sian Jerusalem do marmula barita haluaon i jala dipararat tu angka luat humaliang. Didok “nasa” lapatanna manang ise pe, sian horong dia pe, nuaeng ma tingki na mulak, jala ndang adong be sidalian, ndang marpaima be, ingkon hatop mambuat haputusan manadingkon dalan na so sintong. Nangpe didok Jerusalem alai adong do hatontuanna asa gabe parsidohot di haluaon i ima manjou goar ni Jahowa.
Ndang otomatis bangso na maringanan disi dapotan haluaon, alai angka na manjou goarNa do. Angka na manjou goar ni Jahowa i ma na mangokuhon Jahowa gabe Debatana jala tangkas pasangaphon Ibana saleleng ngoluna. Manjou lapatanna patupa parsombaon tu Jahowa jala mampanghorhon di ngolu na siganupari. Diulahi do muse di ayat on prinsip universal ni haluaon i, ndada holan tu sada bangso, ndada holan tu Israel, nangpe marmula sian pamilliton ni Debata tu nasida.
Marhite Tondi Parbadia na diusehon tu ganup hita, gabe taboto ma mangantusi bagasna dohot ganjangna lapatan ni ngolu on gabe lam malo hita mansagihon tingki laho tumangihon soara ni Tuhan i. Tubu ma las ni roha dohot hadameon. Tapatutoru jala tapaunduk ma rohanta di adopan ni Tuhan i jala tajalo ma Tondi Parbadia i.
Ala ni i, ganup ma hita mangasahon pangajarion dohot pandonganion ni Tondi ni Debata di saluhut ulaon nang angka pardalanan ni ngolu siganup ari. Molo tung maol pe siulahonon, unang olo hita marpangunsandean tu pamingkirion dohot parbinotoanta sambing. Margogo ma hita laho “manurirangi” marhite angka ulaon, panghataion dohot parange siganup ari. Ai i do ulaning umbahen na diusehon Debata TondiNa tu hita, asa manurirangi hita, ro di sude angka pinomparta.
0 Komentar