Huria na hinaholongan ni Tuhanta Jesus Kristus! Buku Parjamita i ma sada buku di Padan na Robi na marisihon angka habisuhon (hikmat). Dihaporseai do paboa Salomo do na manggurithon turpuk on. Songon pengalaman rohani ni Salomo do ia isi ni buku Parjamita on. Nang pe idaon naung apala bisuk Salomo marhite angka ni ginuritna di buku on, alai di panindangionna sandiri, dung digurithon ibana buku on, dihilala ibana do paboa na so dapot ibana dope impola ni parsaoranna tu Debata. Dihilala ibana do ia ngoluna hampa do sasintongna. Alai mangihut, jumpangsa ma jambar sian banua ginjang i ma ngolu na manongtong.
Amang, Inang! Diparhatutu panurat ni buku on do na Debata do pabangkit ibana jala na margomgom gabe Raja ni Israel di Jerusalem. Songon panggomgomi di Israel, dilehon Debata do hamoraon, haulion, dohot habisuhon. Suksuk do i dipasahat Debata. I ma gabe sada pengalaman di partondion ni Salomo songon panurat ni Buku Parjamita on. Sada pasupasu na umbalga na jinalo ni panurat ni buku Parjamita on, i ma habisuhon na jinalona i. Tarida do habisuhonna i, isara ni marhite na mengadili dua halak ina na marsigulut di sada dakdanak posoposo; manontuhon na dia do ina ni dakdanak i situtu.
Asing ni i, tarida do hapistaran ni Salomo sian angka buku na marisihon angka habisuhon di Padan na Robi; i ma Buku Poda, Buku Angka Ende, lumobi buku Parjamita on. Habisuhon i, na sian Debata i sandiri, i do na margogoihon Salomo gabe sahalak raja di Israel jala sahalak pande bisuk na tau marjamita taringot tu sintuhu ni parngoluan di adopan angka jolma ginomgomanna.
Huria ni Tuhanta! Marhite buku Parjamita on, botoon do, paboa na gale do habisuhon i ia so mardongan hata ni Debata. Ai molo so mardonganhon i habisuhon i, gabe so olo do unduk jolma tu huaso ni Debata. Ala ni i, molo tung pe dipasaorhon Debata ragam ni pasupasu, i ma hapistaran, habisuhon nang huaso pe, tongtong ma nian siniraan ni hata ni Debata. Marhite pandohan ni Parjamita i sandiri di ayat 13, hangaluton do didok angka ulaon na tarjadi di hasiangan on. Ringkot do digarisbawahi hata hasiangan dison, i ma istilah na martudutudu tu haportibion.
Gok dosa do tutu hasiangan on, i ma marhite ragam ni angka pangalaho na so hombar tu lomo ni roha ni Debata, isara ni materialisme, hedonisme, egoisme, dohot lan na asing. On ma hangaluton na nidok ni Parjamita i. Taringot tuson ma na ringkot dihilala roha ni Parjamita naeng sulingkitanna marhite hapistaran na jinalona. Tontu, molo manulingkit, i ma sahat tu na manungkun dia bonsirna, songon dia parjadina, jala aha do solusina. I ma na naeng patupaon ni Parjamita. Jala di ayat na mangihut (ay 14) dapot do sada sian na sinulingkitna i.
Amang, Inang! Marhite panulingkition ni Parjamita, dapot rohana ma paboa na laho salpu do sude na tarjadi di hasiangan on. Nunga diida ibana sude angka jadijadian i songon na nidokna di ayat 14, jala nunga diringkoti ibana manulingkit huhut mangarisik songon na nidokna di ayat 13, i do asa sahat ibana tu na mandok na laho salpu do sude angka jadijadian na tarjadi di hasiangan i. Tamba ni i, dipatolhas Parjamita do taringot tu kesia-siaan na masa di hasiangan on. Marhite kalimat hiasan na mandok: “pangeahion di alogo sambing” (menjaring angin) dipatuduhon do songon sada usaho na so marguna manang na sia-sia i ma angka na tarjadi di hasiangan on.
Molo sude do na di hasiangan on na laho salpu, antong na dia ma na manongtong i? Molo pinaherbang turpuk on sahat ro di bindu na mangihut, bolas do dihatai paboa na ingkon di bagasan jala sian Tuhan i do jolma i mangolu, jala i ma na manongtong i (ida. Parj. 2:24 : Ndang adong hape na denggan di jolma i dungkon ni na mangan ibana dohot na minum jala dipasonang rohana mangihutihut ulaonna hian. Alai nang i pe, ingkon pala ni Debata do huida.)
Ala ni i, asa marimpola hapistaran, habisuhon, nang huaso na tajalo ingkon ma nian tapeop mardongan hata ni Debata. Jala sai anggiat ma habisuhonNa i sandiri na tapangasahon di ngolu on. Hombar tu topik minggu, ia na so olo salpu jala na sai manongtong songon na nidok ni turpuk on, i ma Kristus i, naung humopho jolma asa gabe jolma na imbaru saluhutna di bagasan Ibana.
0 Komentar