Jamita Partangiangan tu Minggu X Dung Trinitatis: 1 Tessalonik 5 : 12 – 24

Huria na hinaholongan ni Tuhanta Jesus! Surat 1 Tessalonik i ma sada sian angka surat ni Paulus na jumolo digurithon ibana. Ia tujuan ni Apostel i manggurithon surat on i ma di na laho patoguhon haporseaon ni huria Tessalonik na tardok huria na bajar dope, huhut mangalehon pangapulion di sana taringot tu haroro ni Kristus. Ia turpuk on, i ma bagian parpudi ni surat 1 Tessalonik na marisihon angka poda taringot tu ngolu siganup ari ni angka na porsea di tongatonga ni huria dohot portibi on. 

Marhite na nidok ni ayat parpudi di turpuk on, idaon ma paboa adong do pesan parousia (haroro ni Jesus na paduahalihon) na naeng pasahaton ni turpuk on. Sude na pinasahat ni Apostel Paulus laho ulahonon ni huria Tessalonik laho managam di ari haroroNa i do. Jala molo dipaombuk tu topik minggu X dung trinitatis, taringot tu asi ni roha ni Jahowa na hot ro di salelenglelengna i do na naeng pasahaton ni Apostel i tu huria Tessalonik marhite angka apoapo nang poda na pinasahatna.

Amang, Inang! Di ayat 12, marhite hata huelekelek (request = meminta, memohon) do Apostel Paulus mangidohon tu huria Tessalonik asa mananda nasida jala pasangaponnasida mardongan holong ni roha angka na mangaluhon nasida marhitehite Tuhan i. Na nidok disi tontu angka pemimpin rohani do i isarani songon si Paulus sandiri dohot si Timoteus na sinuruna muse tu huria Tessalonik. Tontu molo pinaombuk muse tu haposoon ni si Timoteus, mansai relevan do pangidoan ni Apostel i dison, asa unang nian jais rohanasida mida si Timoteus ala ni haposoonna i, ala i garida ingkon sangap nian bahenonnasida jala haholongannasida ibana songon na nidok ni ayat 13 i.

Dipasahat Apostel Paulus udut ni hatana taringot tu na manguluhon huria Tessalonik, i ma angka poda, apoapo, singotsingot sian ragam ni angka aspek di ngolu ni huria Tessalonik. Ditonahon ibana do asa (1) paingotonnasida angka na so maradat, (2) apulannasida angka siotik roha, (3) anjuonnasida angka na gale, (4) marlambas ni roha dompak saluhut, (5) matamatahononnasida asa unang dibalos na roa balos ni na roa, gariada asa tongtong na denggan dipareahi, (6) asa tongtong marlas ni rohanasida, (7) unang mansadi martangiang, jala lumobi (8) mandok mauliate di saluhutna, ai i do dipangido Debata sian nasida marhitehite Kristus Jesus. 6 ma sian apoapoon na na naeng ulahonon ni huria Tessalonik songon pangulahononna tu dongan jolma, jala 2 ma siulaonnasida maradophon Debata.

Amang, Inang! Sada sian ulaon ni Tondi ni Debata i ma mangari angka jolma taringot tu na naeng sidohononna, siulahononna dohot siparangehononna. I do na naeng dohonon ni Apostel i marhite ayat 19, na mandok asa unang diintopi nasida tondi i. Na marlapatan do i asa tongtong nian galak tondi ni Debata di rohanasida, na mangajari huria i mangulahon na tinonahon ni Debata marhite naposoNa Apostel Paulus i ma di angka apoapo, poda, dohot sipaingot na pinasahatna. Asa Tondi i ma nian na margogoihon huria i asa unang lea di panurirangon (ay20) jala boi maniop na denggan (ay21) huhut pasidinghon nasa rumang ni na roa (ay22)

Huria ni Tuhanta! Songon na nidok di pamuhai, ia angka na niula ni huria Tessalonik hombar tu na sinurat ni Apostel Paulus di turpuk on, i ma di na laho manomu ari ni Tuhan i do songon nidok ni ayat 24. Ala ni i, laho borhat tu angka ulaon i huhut paimahon ariNa i, dipaborhat Debata sandiri do huria Tessalonik asa margogo mangulahon saluhutna. I do pos ni roha ni Apostel Paulus paboa na diramoti Debata do tondi ni huria i songon nidok ni ayat 23 jala Debata na manjou nasida; laos Ibana do tong na pasauthon songon na nidok ni ayat 24 i.

Ala ni i, tung tapangasahon ma Tondi ni Debata na adong di hita laho mangajari hita mangulahon angka lomo ni roha ni Debata. Tongtong ma nian marsigorgor Tondi i di bagasan rohanta. Asi ni roha ni Debata na hot ro di salelenglelengna, i do na patauhon hita manjalo angka na uli na denggan i marhite Kristus naung taparsaulihon panobusionNa i, jala Tondi Parbadia naung taparsaulihon pandonganionNa i.

3. Debata na manjou hita; ibana do tong na pasauthon angka bagabagaNa i, lumobi taringot tu ari naung binuhulNa di hita nang di hajolmaon saluhutna.