Huria na hinaholongan ni Tuhanta Jesus Kristus! Songon na tarida di angka bindu na asing di buku Psalmen, bindu 148 di buku Psalmen on pe, marisihon taringot tu pamujion tu Debata do. Jala, molo pinatangkas marhite judul ni bindu i dohot isina, ditogihon par Psalmen do asa huhut nian sude na tinompa mamuji Debata, ro di na sian banua ginjang; i ma angka surusuruan, angka bintang na marsinondang, na di banua tonga; i ma angka binatang na di laut, dohot na asing. Sude na diarahon par Psalmen di turpuk on ingkon do mangulahon na sasada on; i ma mamuji Debata. 10 hali ma didok hata ‘puji’ manang na marhadonokhon tu hata i isara ni, ‘mamuji’ dohot ‘pujion’.
Angkup ni patuduhon habalgaon ni Debata na ingkon sipujion, tingting ni par Psalmen di turpuk on laho mamuji Debata boi do martudutudu tu penegasan paboa Debata do mamuji saluhutna i, songon na nidok ni topik minggu i. Ala ni i, nasa na tinompaNa, ingkon do mamuji Ibana. Adong do pigapiga lapatan ni mamuji di turpuk on molo niida sian hata aslina hawlal; boi do marlapatan: merayakan, pasangaphon, mamuji, menjadikan bersinar, memahsyurkan, dohot na asing.
Amang, Inang! Di bona ni ayat 1, ditingtinghon par Psalmen do asa sude na siang banua ginjang mamuji Jahowa Debata. Na masuk tu horong ni na sian banua ginjang i mangihuthon turpuk on, i ma (1) surusuruan dohot paranganna, (2) mata ni ari dohot bulan, dohot sude bintang na marsinondang, (3) langit ni langitan dohot aek angka na di atas ni langit. Ndada na so adong sidaliannasida na ginoaran i umpuji Debata. Dungkon dipajojor par Psalmen angka na sian ginjang na ingkon mamuji Debata, dipaingothon ibana do di ayat 5 paboa Debata do na manjadihon nasida sudena.
Didok do “ai mandokhon Ibana, jadi tartompa nasida”. Sian hata mandokkon, na borhat sian hata asli siwwah na marlapatan command manang mamarenta, marsuru, dna, tarida do na marhite hatana na mamarenta do Debata manompa angka na sian banua ginjang i. Ala ni i, molo Debata manompa nasida marhite na mamarenta, nda ingkon unduk tu Debata ma nasida, jala ingkon pujionnasida Debata? Ndang adong alasan na asing umbahen na tartompa saluhut na sian banua ginjang i, ia so ala ni Debata sandiri na mamarenta nasida asa tartompa marhite HataNa. Jala dungkon ditompa Debata nasida, dibahen do muse sada aturan di nasida asa ture mardalan pangulaannasida ihut tu panompaon ni Debata songon nidok ni ayat 6. Panompaon ni Debata dohot aturan na binahenNa maradophon na tinompaNa gabe sada singotsingot na mansai balga laho paingothon sude na tinompa asa mamuji Ibana.
Ndada holan na sian banua ginjang ingkon mamuji Debata. Alai dohot do nang na sian tano on. Jojor do dipandok par Psalmen angka ise na sian tano on na ingkon mamuji Debata; i ma (1) angka binatang ni laut ro di sude angka lung, (2) api dohot ambolas ro di timus, habahaba, (3) angka dolok dohot sude angka robean, hau angka na marparbue ro di sude hau Ares, (4) binatang dohot sude pahanpahanan, angka gulomit ro di angka pidong na marhabong, (5) angka raja ni tano on dohot sude angka bangso, (5) angka pangarajai ro di sude angka panguhum ni tano on, (6) angka dolidoli dohot na marbaju pe, angka natuatua rap dohot angka na bajar. Mansai tangkas do dipatuduhon par Psalmen paboa ndada holan jolma, alai sude do angka binatang, suansuanan, nang angka dolok pe diarahon laho mamuji Debata. Dos do nang hadirion nasida di adopan ni Debata songon na ro sian banua ginjang i. Ala Debata do nang na manompa nasida, ingkon Debata pujionnasida.
Huria ni Tuhanta! Di ayat 13, diulahi do muse pabotohon na Debata do manompa saluhutna na ginoaran nangkin. Ala Ibana do na manompa, tontu tumimbul ma Ibana sian sudena i, jala sasada goarna do na timbul. Diatasi Ibana do nang sude na tinompaNa i marhite hamuliaonNa. Di ujungna, maradophon bangsoNa na tinompaNa sandiri, disarihon Debata do nasida marhite na mangalehon hagogoon, hamonangan tu nasida. Ndada ala ni gogo ni bangso i, alai ala ni asi ni rohaNa do maradophon na tinompaNa. Laos i ma muse pahusorhon roha ni bangso i asa mamujimuji Debata tongtong.
Ala ni i, molo tung pe tarbahen hita angka ulaon na denggan di tonga ni panghobasionta, tapaloas ma asa Debata marsangap marhite saluhutna i. Asa tongtong Ibana na tumimbul jala mangatasi sude na tinompaNa songon nidok ni ayat 14 i. Patupaon ni Debata do ragam ni asi ni roha di hita, isara ni na mangalehon hagogoon, hatauon dohot na asing, laos mangonjar hita muse asa lam marsihohot mamuji pasangaphon Ibana.
0 Komentar