Huria na hinaholongan ni Tuhanta Jesus Kristus! Turpuk on i ma taringot tu umpama na nihatahon ni Jesus tu angka siseanNa di tingki tongon mardalan dompak Jerusalem (bind. 17:11). Taringot tu sada panguhum na so manghabiari Debata dohot sada parompuan na mabalu do umpama on. Alai na geduk pe panguhum i, di ujungna dipintori do ina na mabalu i ala sai tongtong dijugulhon mangidohon tu panguhum i asa dipintori ibana dompak alona. Naeng didok marhite umpama i, gari panguhum na geduk i dipintori do ina na mabalu i. Lam ma Debata, tung so pintoranna ma angka na pinillitna na manjou Ibana arian dohot borngin?
Asing ni i, boi do panguhum na geduk i tudosan ni portibi on na gok dosa, gok pamunuon, dohot na asing, jala ina na mabalu i tudosan ni halak na porsea na tongtong di tongatonga ni tantangan di portibi on. Alai boi do di ujungna marhamonangan ina na mabalu i dompak panguhum na geduk i. Lapatanna, boi marhamonangan halak na porsea i maradophon portibi on, ala Debata na margogoihon nasida. Jala deba ala gogo ni tangiangnasida, songon na sinoarahon ni turpuk on tibu mamungka sian ayat 1 songon tujuan ni Jesus pasahathon umpama i; asa tongtong nasida martangiang, jala na so tupa lemba.
Amang, Inang! Dipaboa Jesus do unok ni umpama na naeng sihatahononna taringot tu panguhum na geduk dohot ina na mabalu i; paboa ingkon tongtong nasida martangiang, na so tupa lemba. Marhite i, dapot do sada pangantusion ia ngolu partangiangon mansai sentral do di ngolu hakristenon marguru tu na nidok ni Jesus, gariada dohot na niulahonNa isara ni songon na masa di Getsemane andorang so tartangkup Ibana.
Umpama taringot tu panguhum na geduk dohot ina na mabalu gombaran ni kondisi sosial masyarakat ha-Jahudi-on do sasintongna. Di masa ni turpuk on, tarbarita do praktik korupsi ni angka hakim manang panguhum, jala tois do nasida di hasintongan bahkan hukum Taurat jala gumodang mangahut tu kepentingan pribadi. Andul marimbar, ia na mabalu i ma kelompok masyarakat na mansai rentan jala ndang margogo. Di ha-Jahudi-on, jotjot do lipe angka na mabalu sian perlindungan hukum molo so adong tongon keluargana sian horong lahilahi na mangampini nasida.
Marhite umpama on, na patuduhon di ujungna na dapotan pamintorion do na mabalu i; tarida do hinagogo ni “tangiang” na ginombarhon ni parsitutuon ni na mabalu i laho mangelek panguhum i anggiat dipintori ibana. Asing ni i, boi do bahenon nang perbandingan na mandok, gari panguhum na geduk i dipintori do ina na mabalu, nda lam ma Debata? Tung so pintoranNa angka na pinillitNa, angka na manghaposi Ibana?
Huria ni Tuhanta! Perbandingan songon naung pinatorang di ginjang, i do dipasahat Jesus dung sun Ibana patoranghon umpama i: paboa gari panguhum i dipintori na mabalu i, lam ma Debata? Alai di udut ni hatorangan ni umapama i na pinasahatNa – andorang so dihatahon Ibana muse umpama na asing dunghon turpuk on – dipasahat Jesus do sungkunsungkun retoris di ujung ni turpuk on.
Songon sungkunsungkun na so pola mangharinghothon alus, alai naeng mangonjar roha dohot pingkiran ni na umbege, marhite sungkunsungkun retoris i do Jesus naeng pahantushon paboa mansai ringkot haporseaon i peopon ni angka jolma na di tano on sahat ro di ari na naeng ro muse Ibana, na ginombarhonNa sandiri songon Anak ni Jolma i.
Ala ni i, di bagasan ngolu partangiangon na manongtong ma hita songon na ginombarhon ni ina na mabalu i. Tung sura taadopi pe na maol, ketidakadilan, nang hageduhon songon na ginombarhon ni panguhum na geduk i, tongtong ma tahajugulhon mangido gogo sian Tuhan i, anggiat margogo hita di angka na taadopi i. Ngolu partangiangon on i do sada na patuduhon haporseaonta. Na so tupa lemba hita disi songon nidok ni Jesus i, jala ingkon peoponta do haporseaonta marhite partangiangonta i sahat ro di manang sadihari pe dilehon Tuhan i di hita tingki parasianNa.
0 Komentar