Manghatindanghon Haporseaon di HKBP Simaremare Jae Taon Ajaran 2025

Pinuji ma Debata – ala dung mardalan hurang lobi sataon parguruon ni na naeng manghatindanghon haporseaon di HKBP Simaremare Jae – topet ma di ari Jumat, 26 Desember 2025 (Pesta Natal II) nasida manghatindanghon haporseaon. 49 halak ma na parsidohot di na manghatindanghon haporseaon i naung marsiajar saleleng hurang lobi sataon, tamba ni pitu halak nari na ro sian pangarantoan na parsidohot.

Tontu las do roha, ala saleleng sataon on, parsidohot do hami di na laho mangajari nasida taringot tu angka na ringkot songon bohal nasida di na laho manghatindanghon haporseaon. Hombar tu parsuruon ni Inang Pandita Rista br Bancin songon Uluan Huria di HKBP Simaremare Jae, marsasa bulan ma hami dohot nasida marsorinsorin di na laho mangajari angka parguru malua. Isara ni molo martingki ahu mangajar di Bulan April, nasida ma muse manguduti di Bulan Mei, laos songon i ma satorusna.

Mauliate do rohangku, ala diparar Debata dope gogongku nang parbinotoanku marhite Inang Pandita na padohothon ahu laho mangajari angka parguru malua di HuriaNa i. Borhat sian Poda Tohonan, tontu sada sian ulaon ni Pandita do taringot tu pangajarion na disagihon muse tu tohonan na asing, lumobi Guru Huria. Ala ni i, songon sahalak parhobas na parade diri gabe Guru Huria, silasniroha do molo tardok boi dope iba mangurupi pasingkophon ulaon ni Debata na pinasahatNa marhite tohonan hapanditaon – na diputihi muse bahen ulaon haguruon.

Di bagasan sataon pangajarion on, tontu sai adong do hasilapan manang hahuranganniba songon pangajari. Ala ni i, tangkas do hudok tu angka parguru malua, asa unang alang rohanasida laho mangalehon masukan, saran na tontu marhagunaan laho pahembanghon jala padasiphon parsiajaran ni parguru malua tu tingkitingki na naeng ro. Ihut tusi, hudok do muse tu nasida, asa unang pintor merasa puas nasida dungkon manghatindanghon haporseaon annon. Gariada, parmulaan dope i na ingkon torushononnasida laho marsiajar taringot tu Hata ni Debata dohot taringot tu HuriaNa.

Apresiasi satimbotimbona ma tu angka anggingku, nang ibotongku na tardok "berprestasi" di tonga ni parsiajaran na sataon on. Tontu, sai adong do pigapiga halak na tardok aktif di tingki marsiajar, jala sai mura di na laho manangkup parsiajaran na nidapotna. Alai, nang tu angka na humurang pe di parrohaon laho marsiajar, tongtong ma sinosoan asa sai lam dilehon raha tu parguruon, lumobi parguruon di Hata ni Debata.

Parpudi, goarna do daina. Ala naung manghatindanghon haporseaon angka anggingkon, tangiangniba asa marsihohot ma nasida manghatindanghon haporseaonnasida be di tonga ni ngolu na lam godang tantangan on. Na ingkon tarida ma nian parbue ni panghatindanghonon di haporseaonnasida i marhite, parange, hata, pangalaho, nang marhite angka prestasinasida be di parsingkolaanna.

Sai bisuk ma angka anggiku dohot ibotongku laho mangadopi zaman naung serba canggih, lumobi di pamangkeon ni gadget, internet, sosial media, nang AI na lam tu majuna nuaeng na ingkon manat sitatapon. 

Sai Tuhanta ma na margogoihon angka anggi dohot ibotongku.

Tabe sian HKBP Simaremare Jae, Ressort Laguboti.

Horas